Bright's Anglo-Saxon Reader/The Battle of Brunanburh

Hēr Æðelstān cyning,  eorla drihten,
beorna bēahgifa,  and his brōðor eac,
Ēadmund æðeling,  ealdorlangne tīr
geslōgon æt sæcce  sweorda ęcgum
5ymbe Brunanburh:  bordweall clufon,[5]
hēowon heaðolinde  hamora lāfum,
eaforan Ēadweardes;  swā him geæðele wæs
fram cnēomāgum,  ðæt hī æt campe oft
wið lāðra gehwæne  land ealgodon,
10hord and hāmas.  Hęttend crungon,[10]
Scotta leode  and scipflotan,
fǣge feollon:  feld dennode
sęcga swāte,  siþþan sunne ūpp
on morgentīd,  mǣre tungol,
15glād ofer grundas,  Godes candel beorht,[15]
ēces Drihtnes,  oð sīo æðele gesceaft
sāh to setle.  Ðær læg sęcg mǫnig
gārum āgēted,  guma Norðerna
ofer scyld scoten,  swylce Scyttisc ēac
20wērig wīges-sæd.  Wesseaxe forð[20]
andlangne dæg  ēoredcystum
on lāst lęgdon  lāðum ðēodum;
heowon hęreflȳman  hindan ðearle
​mēcum mylenscearpum.  Myrce ne wyrndon
heardes handplegan  haeleða nānum,[25]
ðāra ðe mid Anlāfe  ofer ēargebland
on lides bōsme  land gesōhton
5fǣge tō gefeohte.  Fīfe lāgon
on ðām campstęde  cyningas geonge
sweordum āswęfede,  swylce seofone ēac[30]
eorlas Anlāfes,  unrīm hęrges,
flotena and Scotta.  Ðǣr geflȳmed wearð
10Norðmanna brego,  nēade gebǣded
tō lides stefne  lȳtle weorode :
crēad cnear on flot ;  cyning ūt gewāt[35]
on fealone flōd,  feorh genęrede.
Swylce ðǣr ēac sē frōda  mid flēame cōm
15on his cȳððe norð,  Constantīnus,
hār hilderinc ;  hreman ne ðorfte
meca gemānon :  he wæs his māga sceard,[40]
frēonda gefylled  on folcstęde,
beslægen æt sæcce,  and his sunu forlēt
20on wælstōwe  wundum forgrunden,
geongne æt gūðe.  Gylpan ne ðorfte
beorn blandenfeax  billgeslihtes,[45]
eald inwitta,  ne Anlāf ðȳ mā
mid heora hęrelāfum ;  hlihhan ne ðorfton,
25ðæt hī beaduweorca  bęteran wurdon
on campstęde  cumbolgehnāstes ;
gārmittinge,  gumena gemōtes,[50]
wǣpengewrīxles,  ðæs hī on wælfelda
wið Ēadweardes  eaforan plegodon.
30Gewiton him þā Norðmęnn  nægledcnearrum,
drēorig daroða lāf,  on Dinges mere
ofer dēop wæter  Dyflin sēcan,[55]
and eft Īraland,  ǣwiscmōde.
​Swylce ðā gebrōðor  bēgen aetsǫmne,
cyning and æðeling,  cȳððe sōhton
Wesseaxna land,  wīges hrēmge.
Lēton him behindan  hrā bryttigan[60]
5salowigpādan,  ðone sweartan hræfn,
hyrnednębban,  and ðone hasopādan
earn æftan hwīt,  ǣses brūcan,
grǣdigne gūðhafoc,  and ðæt grǣge dēor,
wulf on wealda.  Ne wearð wæl māre[65]
10on ðȳs īglande  ǣfre gȳta
folces gefylled  beforan ðyssum
sweordes ęcgum,  ðæs ðe ūs sęcgað bēc,
ealde ūðwitan,  siþþan ēastan hider
Ęngle and Seaxe  ūpp becōmon[70]
15ofer brāde brimu,  Brytene sōhton,
wlance wīgsmiðas  Wēalas ofercōmon,
eorlas ārhwate  eard begēaton.