Donald M'Donald (1824)/Donald M'Donald

For other versions of this work, see Donald MacDonald.
​

Donald M'Donald.

My name it is Donald M'Donald, I live in the Highlands sae grand; I've follow'd our banners, and will do, Wharever my maker has land. Whan rankit amang the blue bannets, Nae danger can fear me ava, I ken that my brethren around me, Are either to conquer or fa'. Brogues and brochen, and a', Brochon and brogues, and a'; And is na she very weal aff Wha has brogues and brochan and a'.
Last year we were wonderful canty, Our friends and our country to see: But since the proud Carsidan's vauntie, We'll meet him by land or by sea.Whanever a clan is disloyal. Wharever our king has a foe, He'll quickly see Donald M'Donald, Wi his Highlandmen a' in a row. ​Guns and pistols an’ a’, Pistols and guns, and a’.He'll quickly see Donald M'Donald, Wi' guns and pistols an' a’.
What tho’ we befriended young Charlie, To tell it I dinna think shame Poor lad he came to us but barely, And reckoned our mountains his hame. It’s true that our reason forbade us But tenderness carried the day: Had Geordie came friendless amang us,Wi' him we had a’ gane away.Sword and buckler, and a’, Buckler and sword, an' a’; For George we'll encounter the deevil, Wi’ sword and buckle, and a’.
And oh ! I wad earnestly press him, The keys o’ the east to retain; For should he gi’e up the possession, We’d soon hae to force them again Than yield up ae inch wi’ dishonour, Tho’ it were my finishing blow, When he may depend on M'Donald, Wi' his Highland men a' in a row. ​Knees and elbows, and a', Elbows and knees and a'; Depend upon Donald M'Donald Wi's knees and elbows, and a'.
If Buonaparte land at Fort William, Auld Europe nae langer sall grane, I laugh when I think how we'll gall him, Wi' bullet, wi' steel, and wi' stane. Wi' rocks o' the Nevis and Gairy, We'll rattle him aff frae our shore; Or lull him asleep in a cairney, And sing him Lochaber no more. Stanes and bullets, an' a', Bullets and stanes and a': We'll finish the Corsican callan, Wi' stanes and bullets and a'.
The Gordon is gude in a hurry, The Campbell is steel to the bane, And Grant, and M'Kenzie, and Murray, And Cameron will hurkle to nane, The Stuart is sturdy and wannel, And sae is M'Cleod and M'Kay, And to their gude-brother, M'Donald, Shall ne'er be the last in the fray. ​Brogues and brochen, and a', Brochen and brogues, and a'. Sae up wi' the bonny blue bannet, The kilt and the feather and a'.

This article is issued from Wikisource. The text is available under Creative Commons Attribution-Share Alike 4.0 unless otherwise noted. Additional terms may apply for the media files.