Page:Fugitive Poetry 1600-1878.djvu/465

This page has been proofread, but needs to be validated.
NUMBER ONE.
447
Johnny, man! ye'll min' your prayers, When ye gang far frae hame;But. Johnny, dinna ye split hairs— We dinna dee't at hame.
Johnny, man! yer Bible read, As we aye dee at hame:But, Johnny, aye keep clear yer heid, Ye'll need it far frae hame.
Johnny! min' yer Carritches, Whan hine awa' frae hame;But, Johnny, min' yer parritch is O' consequence frae hame.
(Johnny, man! I mean to say, Whan laddies lea' their hame,Johnny's duty's jist to hae A steady e'e to hame.)
Oh, Johnny! ye maun siller mak'— We've aye said that at hame;An' a' within yer minta tak'— As we aye dee at hame.
Ech, Johnny! keep yer lugs on en', Whan ye're awa' frae hame;For, Johnny, ye maun trust to nane Ye didna ken at hame.
An' aye say wi' the powerin' fowk— We contar nane at hame;A chiel that tells his min's a gowk! An' we've nae gowks at hame.
An', Johnny! ye maun boo yer neck (For, lad, ye'll be frae hame);An' aye be at the rich man's beck— Ye'll profit by't, frae hame.
An', Johnny! whan ye seek a wife To set up i' yer hame,Be sure she has a tocher rife, To mak' a couthy hame.
Syne, Johnny! if ye bairnies hae, To brichten up yer hame,Teach them this "New Chief En'" to say: The "auld" keep frae yer hame.
This article is issued from Wikisource. The text is available under Creative Commons Attribution-Share Alike 4.0 unless otherwise noted. Additional terms may apply for the media files.