Page:The poetical works of Robert Burns.djvu/133

This page has been proofread, but needs to be validated.
THE POEMS OF BURNS.
81
The tapetless, ramfeezl'd hissie,She's saft at best, and something lazy,Quo' she, 'Ye ken, we've been sae busy,This month an' mair,That trouth my head is grown right dizzie,An' something sair.'
Her dowff excuses pat me mad;'Conscience,' says I, 'ye thowless jad!I'll write, an' that a hearty blaud,This vera night;So dinna ye affront your trade,But rhyme it right.
'Shall bauld Lapraik, the king o' hearts,Tho' mankind were a pack o' cartes,Roose you sae weel for your deserts,In terms sae friendly,Yet ye'll neglect to shaw your parts,An' thank him kindly!'
Sae I gat paper in a blink,An' down gaed stumpie in the ink:Quoth I, 'Before I sleep a wink,I vow I'll close it;An' if ye winna mak it clink,By Jove I'll prose it!'
Sae I've begun to scrawl, but whetherIn rhyme, or prose, or baith thegither,Or some hotch-potch that's rightly neither,Let time mak proof;But I shall scribble down some bletherJust clean aff-loof.
My worthy friend, ne'er grudge an' carp,Tho' fortune use you hard an' sharp;Come, kittle up your moorland harpWi' gleesome touch!Ne'er mind how fortune waft an' warp;She's but a bitch.
She's gien me mony a jirt an' fleg,Sin' I could striddle owre a rig;But, by the Lord, tho' I should begWi' lyart pow,I'll laugh, an' sing, an' shake my leg,As lang's I dow!
Now comes the sax an' twentieth simmer,I've seen the bud upo' the timmer,Still persecuted by the limmerFrae year to year:But yet, despite the kittle kimmer,I, Rob am here.
Do ye envy the city Gent,Behind a kist to lie an' sklent,Or purse-proud, big wi' cent per cent;An' muckle wame,In some bit Brugh to representA Bailie's name?
Or is't the paughty, feudal Thane,Wi' ruffl'd sark an' glancing cane,Wha thinks himsel nae sheep-shank bane,But lordly stalks,While caps and bonnets aff are taen,As by he walks?
'O Thou wha gies us each guid gift!Gie me o' wit an' sense a lift,Then turn me, if Thou please, adrift,Thro' Scotland wide;Wi' cits nor lairds I wadna shift,In a' their pride!'
Were this the charter of our state,'On pain o' hell be rich an' great,'Damnation then would be our fate,Beyond remead;But, thanks to Heaven! that's no the gateWe learn our creed.
For thus the royal mandate ran,When first the human race began,'The social, friendly, honest man,Whate'er he be,'Tis he fulfils great Nature's plan,And none but he!'
O mandate glorious and divine!The followers of the ragged Nine,Poor, thoughtless devils! yet may shine,In glorious light,While sordid sons of Mammon's lineAre dark as night.
This article is issued from Wikisource. The text is available under Creative Commons Attribution-Share Alike 4.0 unless otherwise noted. Additional terms may apply for the media files.