Page:The poetical works of Robert Burns.djvu/277

This page has been proofread, but needs to be validated.
THE SONGS OF BURNS.
217

TAM GLEN.

TUNE—'THE MUCKING O' GEORDIE'S BYRE.'

My heart is a breaking, dear Tittie,Some counsel unto me come len',To anger them a' is a pity;But what will I do wi' Tam Glen?
I'm thinking, wi' sic a braw fallow,In poortith I might mak a fen';What care I in riches to wallow,If I maunna marry Tam Glen?
There's Lowrie the laird o' Dumeller,'Guid-day to you, brute!' he comes ben:He brags and he blaws o' his siller,But when will he dance like Tam Glen?
My minnie does constantly deave me,And bids me beware o' young men;They flatter, she says, to deceive me;But wha can think sae o' Tam Glen?
My daddie says, gin I'll forsake him,He'll gie me guid hunder marks ten:But, if it's ordain'd I maun take him,O wha will I get but Tam Glen?
Yestreen at the Valentines' dealing,My heart to my mou gied a sten:For thrice I drew ane without failing,And thrice it was written, Tam Glen.
The last Halloween I was waukinMy droukit sark-sleeve, as ye ken;His likeness cam up the house staukin—And the very grey breeks o' Tam Glen!
Come counsel, dear Tittie, don't tarry;I'll gie you my bonie black hen,Gif ye will advise me to marryThe lad I lo'e dearly, Tam Glen.

WHAT CAN A YOUNG LASSIE DO WI' AN AULD MAN.

TUNE—'WHAT CAN A LASSIE DO.'

What can a young lassie, what shall a young lassie,What can a young lassie do wi' an auld man?Bad luck on the penny that tempted my minnieTo sell her poor Jenny for siller an' lan'!Bad luck on the penny, &c.
He's always compleenin frae mornin to e'enin,He hosts and he hirples the weary day lang:He's doylt and he's dozin, his bluid it is frozen,O, dreary's the night wi' a crazy auld man!
He hums and he hankers, he frets and he cankers,I never can please him do a' that I can;He's peevish, and jealous of a' the young fellows:O, dool on the day, I met wi' an auld man!
My auld auntie Katie upon me takes pity,I'll do my endeavour to follow her plan;I'll cross him, and rack him, until I heart-break him,And then his auld brass will buy me a new pan.
This article is issued from Wikisource. The text is available under Creative Commons Attribution-Share Alike 4.0 unless otherwise noted. Additional terms may apply for the media files.