Page:The poetical works of Robert Burns.djvu/278
This page has been proofread, but needs to be validated.
218
THE SONGS OF BURNS.
THE BLUE-EYED LASSIE.
TUNE—'THE BLATHRIE O'T.'
I gaed a waefu' gate yestreen,A gate, I fear, I'll dearly rue;I gat my death frae twa sweet een,Twa lovely een o' bonie blue.'Twas not her golden ringlets bright,Her lips like roses wat wi' dew,Her heaving bosom lily-white;—It was her een sae bonie blue.
She talk'd, she smil'd, my heart she wyl'd,She charm'd my soul I wist na how;And aye the stound, the deadly wound,Cam frae her een sae bonie blue.But spare to speak, and spare to speed;She'll aiblins listen to my vow:Should she refuse, I'll lay my deadTo her twa een sae bonie blue.
GANE IS THE DAY.
TUNE—'GUIDWIFE COUNT THE LAWIN.'
Gane is the day, and mirk's the night,But we'll ne'er stray for faute o' light,For ale and brandy's stars and moon,And bluid-red wine's the risin sun.
CHORUS.Then guidwife count the lawin, the lawin, the lawin,Then guidwife count the lawin, and bring a coggie mair.
There's wealth and ease for gentlemen,And semple-folk maun fecht and fen',But here we're a' in ae accord,For ilka man that's drunk's a lord.Then guidwife count, &c.
My coggie is a haly pool,That heals the wounds o' care and dool;And pleasure is a wanton trout,An' ye drink it a' ye'll find him out.Then guidwife count, &c.
O, FOR ANE AND TWENTY, TAM!
TUNE—'THE MOUDIEWORT.'
CHORUS.An O for ane and twenty, Tam!An hey, sweet ane and twenty, Tam!I'll learn my kin a rattlin sang,An I saw ane and twenty, Tam.
They snool me sair, and haud me down,And gar me look like bluntie, Tam!But three short years will soon wheel roun',And then comes ane and twenty, Tam.And O for ane, &c.
A gleib o' lan', a claut o' gear,Was left me by my auntie, Tam;At kith or kin I need na spier,An I saw ane and twenty, Tam.An O for ane, &c.
They'll hae me wed a wealthy coof,Tho' I mysel' hae plenty, Tam;But hear'st thou, laddie, there's my loof,I'm thine at ane and twenty, Tam!An O for ane, &c.